Audi Q3 vjen në vjeshtë

Modeli më i vogël ‘crossover’ i prodhuesit të njohur “Audi” do të paraqitet në sallonin e automobilave në Paris, këtë vjeshtë. Të paktën, kështu pohon një burim i përafërt me këtë prodhues veturash nga Ingëlshtadi, i cili me mjaft mjeshtëri fshehë çdo informatë në lidhje me ‘crossover’-in e ri. Pasi që publikoi kohën e lansimit të tij, burimi në fjalë vendosi që të zbulojë disa të dhëna edhe rreth teknologjisë së tij.

Me ardhjen në treg, modeli i ri “Audi Q3” do të jetë njërin nga tre motorët e ndryshëm. Motori themelor do të jetë ai me emrin TSFI me një vëllim 2.0 litra, i cili shoqërohet nga ndërruesi i shpejtësive me gjashtë shkallë dhe do të zhvillojë 170 kuaj-fuqi. Sa i përket lirimit të dyoksidit të karbonit, thuhet se kjo sillet rreth 172 g CO2 për 1 km.

Versioni më i fuqishëm i motorit 2.0 litra TFSI do të shoqërohet me ndërruesin e shpejtësive “S Tronic”, do të zhvillojë 211 kuaj-fuqi dhe do të lirojë 184 g CO2/km. Ofertën fillestare do ta rrumbullakosë motori 2.0 TDI i cili po ashtu shoqërohet nga ndërruesi i shpejtësive “S Tronic”, falë të cilit ky variant i modelit “Audi Q3” do të zhvillojë 170 kuaj-fuqi dhe do të lirojë 158 g CO2/km. Më vonë pritet që të ketë edhe lloje të tjera të motorëve.

Modeli i ri “Audi Q3” do të bazohet në platformën të cilën “Audi” e ka marrë nga automobili “Volkswagen Tiguan”. Në aspektin vizual, ai do të mbështetet në ‘crossover’-in konceptual, të cilin kompania e ka paraqitur në Shangai në vitin 2007.